1 שׁיר מזמור לדוד׃
2 נכון לבי אלהים אשׁירה ואזמרה אף־כבודי׃
3 עורה הנבל וכנור אעירה שׁחר׃
4 אודך בעמים יהוה ואזמרך בל־אמים׃
5 כי־גדול מעל־שׁמים חסדך ועד־שׁחקים אמתך׃
6 רומה על־שׁמים אלהים ועל כל־הארץ כבודך׃
7 למען יחלצון ידידיך הושׁיעה ימינך וענני׃
8 אלהים דבר בקדשׁו אעלזה אחלקה שׁכם ועמק סכות אמדד׃
9 לי גלעד לי מנשׁה ואפרים מעוז ראשׁי יהודה מחקקי׃
10 מואב סיר רחצי על־אדום אשׁליך נעלי עלי־פלשׁת אתרועע׃
11 מי יבלני עיר מבצר מי נחני עד־אדום׃
12 הלא־אלהים זנחתנו ולא־תצא אלהים בצבאתינו׃
13 הבה־לנו עזרת מצר ושׁוא תשׁועת אדם׃
14 באלהים נעשׂה־חיל והוא יבוס צרינו׃