1 למנצח על־השׁמינית מזמור לדוד׃
2 הושׁיעה יהוה כי־גמר חסיד כי־פסו אמונים מבני אדם׃ [1]
3 שׁוא ידברו אישׁ את־רעהו שׂפת חלקות בלב ולב ידברו׃
4 יכרת יהוה כל־שׂפתי חלקות לשׁון מדברת גדלות׃
5 אשׁר אמרו ללשׁננו נגביר שׂפתינו אתנו מי אדון לנו׃
6 משׁד עניים מאנקת אביונים עתה אקום יאמר יהוה אשׁית בישׁע יפיח לו׃
7 אמרות יהוה אמרות טהרות כסף צרוף בעליל לארץ מזקק שׁבעתים׃
8 אתה־יהוה תשׁמרם תצרנו מן־הדור זו לעולם׃
9 סביב רשׁעים יתהלכון כרם זלות לבני אדם׃