1 על נהרות בבל שׁם ישׁבנו גם־בכינו בזכרנו את־ציון׃
2 על־ערבים בתוכה תלינו כנרותינו׃
3 כי שׁם שׁאלונו שׁובינו דברי־שׁיר ותוללינו שׂמחה שׁירו לנו משׁיר ציון׃
4 איך נשׁיר את־שׁיר־יהוה על אדמת נכר׃
5 אם־אשׁכחך ירושׁלם תשׁכח ימיני׃
6 תדבק־לשׁוני לחכי אם־לא אזכרכי אם־לא אעלה את־ירושׁלם על ראשׁ שׂמחתי׃
7 זכר יהוה לבני אדום את יום ירושׁלם האמרים ערו ערו עד היסוד בה׃
8 בת־בבל השׁדודה אשׁרי שׁישׁלם־לך את־גמולך שׁגמלת לנו׃
9 אשׁרי שׁיאחז ונפץ את־עלליך אל־הסלע׃