1 למנצח מזמור לדוד׃ [1]
2 חלצני יהוה מאדם רע מאישׁ חמסים תנצרני׃
3 אשׁר חשׁבו רעות בלב כל־יום יגורו מלחמות׃
4 שׁננו לשׁונם כמו־נחשׁ חמת עכשׁוב תחת שׂפתימו סלה׃
5 שׁמרני יהוה מידי רשׁע מאישׁ חמסים תנצרני אשׁר חשׁבו לדחות פעמי׃
6 טמנו־גאים פח לי וחבלים פרשׂו רשׁת ליד־מעגל מקשׁים שׁתו־לי סלה׃
7 אמרתי ליהוה אלי אתה האזינה יהוה קול תחנוני׃
8 יהוה אדני עז ישׁועתי סכתה לראשׁי ביום נשׁק׃
9 אל־תתן יהוה מאויי רשׁע זממו אל־תפק ירומו סלה׃
10 ראשׁ מסבי עמל שׂפתימו יכסומו׃
11 ימיטו עליהם גחלים באשׁ יפלם במהמרות בל־יקומו׃
12 אישׁ לשׁון בל־יכון בארץ אישׁ־חמס רע יצודנו למדחפת׃
13 ידעת כי־יעשׂה יהוה דין עני משׁפט אבינים׃
14 אך צדיקים יודו לשׁמך ישׁבו ישׁרים את־פניך׃