1 למנצח בנגינות מזמור לדוד׃
2 בקראי ענני אלהי צדקי בצר הרחבת לי חנני ושׁמע תפלתי׃
3 בני אישׁ עד־מה כבודי לכלמה תאהבון ריק תבקשׁו כזב סלה׃
4 ודעו כי־הפלה יהוה חסיד לו יהוה ישׁמע בקראי אליו׃
5 רגזו ואל־תחטאו אמרו בלבבכם על־משׁכבכם ודמו סלה׃ [1]
6 זבחו זבחי־צדק ובטחו אל־יהוה׃
7 רבים אמרים מי־יראנו טוב נסה־עלינו אור פניך יהוה׃
8 נתתה שׂמחה בלבי מעת דגנם ותירושׁם רבו׃
9 בשׁלום יחדו אשׁכבה ואישׁן כי־אתה יהוה לבדד לבטח תושׁיבני׃