1 למנצח לבני־קרח מזמור׃
2 כל־העמים תקעו־כף הריעו לאלהים בקול רנה׃ [1]
3 כי־יהוה עליון נורא מלך גדול על־כל־הארץ׃
4 ידבר עמים תחתינו ולאמים תחת רגלינו׃
5 יבחר־לנו את־נחלתנו את גאון יעקב אשׁר־אהב סלה׃
6 עלה אלהים בתרועה יהוה בקול שׁופר׃
7 זמרו אלהים זמרו זמרו למלכנו זמרו׃
8 כי מלך כל־הארץ אלהים זמרו משׂכיל׃
9 מלך אלהים על־גוים אלהים ישׁב על־כסא קדשׁו׃
10 נדיבי עמים נאספו עם אלהי אברהם כי לאלהים מגני־ארץ מאד נעלה׃