1 למנצח על־יונת אלם רחקים לדוד מכתם באחז אתו פלשׁתים בגת׃
2 חנני אלהים כי־שׁאפני אנושׁ כל־היום לחם ילחצני׃
3 שׁאפו שׁוררי כל־היום כי־רבים לחמים לי מרום׃
4 יום אירא אני אליך אבטח׃
5 באלהים אהלל דברו באלהים בטחתי לא אירא מה־יעשׂה בשׂר לי׃
6 כל־היום דברי יעצבו עלי כל־מחשׁבתם לרע׃
7 יגורו יצפינו המה עקבי ישׁמרו כאשׁר קוו נפשׁי׃
8 על־און פלט־למו באף עמים הורד אלהים׃
9 נדי ספרתה אתה שׂימה דמעתי בנאדך הלא בספרתך׃
10 אז ישׁובו אויבי אחור ביום אקרא זה־ידעתי כי־אלהים לי׃
11 באלהים אהלל דבר ביהוה אהלל דבר׃
12 באלהים בטחתי לא אירא מה־יעשׂה אדם לי׃
13 עלי אלהים נדריך אשׁלם תודת לך׃
14 כי הצלת נפשׁי ממות הלא רגלי מדחי להתהלך לפני אלהים באור החיים׃