1 למנצח על־הגתית מזמור לדוד׃
2 יהוה אדנינו מה־אדיר שׁמך בכל־הארץ אשׁר תנה הודך על־השׁמים׃ [1]
3 מפי עוללים וינקים יסדת עז למען צורריך להשׁבית אויב ומתנקם׃ [2]
4 כי־אראה שׁמיך מעשׂי אצבעתיך ירח וכוכבים אשׁר כוננתה׃ [3]
5 מה־אנושׁ כי־תזכרנו ובן־אדם כי תפקדנו׃ [4]
6 ותחסרהו מעט מאלהים וכבוד והדר תעטרהו׃
7 תמשׁילהו במעשׂי ידיך כל שׁתה תחת־רגליו׃
8 צנה ואלפים כלם וגם בהמות שׂדי׃
9 צפור שׁמים ודגי הים עבר ארחות ימים׃
10 יהוה אדנינו מה־אדיר שׁמך בכל־הארץ׃