1 למנצח על־הגתית לאסף׃
2 הרנינו לאלהים עוזנו הריעו לאלהי יעקב׃
3 שׂאו־זמרה ותנו־תף כנור נעים עם־נבל׃
4 תקעו בחדשׁ שׁופר בכסה ליום חגנו׃
5 כי חק לישׂראל הוא משׁפט לאלהי יעקב׃
6 עדות ביהוסף שׂמו בצאתו על־ארץ מצרים שׂפת לא־ידעתי אשׁמע׃
7 הסירותי מסבל שׁכמו כפיו מדוד תעברנה׃
8 בצרה קראת ואחלצך אענך בסתר רעם אבחנך על־מי מריבה סלה׃
9 שׁמע עמי ואעידה בך ישׂראל אם־תשׁמע־לי׃
10 לא־יהיה בך אל זר ולא תשׁתחוה לאל נכר׃
11 אנכי יהוה אלהיך המעלך מארץ מצרים הרחב־פיך ואמלאהו׃
12 ולא־שׁמע עמי לקולי וישׂראל לא־אבה לי׃
13 ואשׁלחהו בשׁרירות לבם ילכו במועצותיהם׃
14 לו עמי שׁמע לי ישׂראל בדרכי יהלכו׃
15 כמעט אויביהם אכניע ועל צריהם אשׁיב ידי׃
16 משׂנאי יהוה יכחשׁו־לו ויהי עתם לעולם׃
17 ויאכילהו מחלב חטה ומצור דבשׁ אשׂביעך׃