1 למנצח אל־תשׁחת מזמור לאסף שׁיר׃
2 הודינו לך אלהים הודינו וקרוב שׁמך ספרו נפלאותיך׃
3 כי אקח מועד אני מישׁרים אשׁפט׃
4 נמגים ארץ וכל־ישׁביה אנכי תכנתי עמודיה סלה׃
5 אמרתי להוללים אל־תהלו ולרשׁעים אל־תרימו קרן׃
6 אל־תרימו למרום קרנכם תדברו בצואר עתק׃
7 כי לא ממוצא וממערב ולא ממדבר הרים׃
8 כי־אלהים שׁפט זה ישׁפיל וזה ירים׃
9 כי כוס ביד־יהוה ויין חמר מלא מסך ויגר מזה אך־שׁמריה ימצו ישׁתו כל רשׁעי־ארץ׃
10 ואני אגיד לעלם אזמרה לאלהי יעקב׃
11 וכל־קרני רשׁעים אגדע תרוממנה קרנות צדיק׃